انا مسلم و ياقول للارهاب لا لا لا لا

وسوف اتلوا فى البداية خير الكلام كلام الله
( بسم الله الرحمن الرحيم )

( لتجدن أشد الناس عداوة للذين ءامنوا اليهود والذين أشركوا ولتجدن أقربهم مودة للذين ءامنوا الذين قالوا انا نصارى ذلك بأن منهم قسيسين ورهبانا وأنهم لايستكبرون )

(صدق الله العظيم)

هبدا كلامى واقول بعد كلام الله خير الكلام

وهقول

قوليلي يا بنت مصر هو انتي ايه ذنبك

تموتي ليه يا جميله و ينكسوا علمك

مين اللي خان الوطن و بكى عيون اهلك

......انا مصري مسلم لكن دمي من دمك

قالتلي انا مش عارفه.. ليه قتلوني ؟

لو كنت حتى غلط كانوا يعاتبوني

انا كل ذنبي خرجت و الفرحه في عيوني

في ليله كانت عيد مع ناس حبونى

ماشيه في شارع فرحانه بسنه جديده

كان عندي فيها امل و اماني سعيده

فجأه جرى اللي جرى و لقتني وحيده

صوت الصراخ تسمعه روحي وانا بعيده

و شوفت امي بتبكي وصوت نداها عالي

رايحه لفين يا مريم يا عمر كان الغالى

و اصحابي مسلم مسيحي الكل بكاني

بدموع ساكنها الألم على اللي جرالى

مانا برضوا ليا اصحاب كتير مسلمين

ولا عمرنا اختلفنا رغم اختلاف الدين

كان بينا حب و موده و لبعضنا قريبين

وان حد فيهم يحزن بلاقي قلبي حزين

قلت يا مريم يمكن موتك عشان قبطيه

فكان دينك السبب انك تكوني ضحيه

قالتلي لا يا مصري مش هيا دي القضيه

انا اتقتلت عشان تحصل فتنه طائفيه

عشان كدا بوصيكم تفضلوا سوا مع بعض

قتلي و انا وسطيكم زي اغتصاب العرض

انا قلت حقك هيرجع... حقك علينا فرض

و اللي طفوا شمعتك هنخسف بيهم الارض

خلص كلامى ولكن مش انتهت احداثى